Lazim Destani ka marrë pjesë në takimin tradicional të mërgimtarëve të Veshallës, “Votra jonë na bashkon”. Ashtu si në të kaluarën, kjo ngjarje u organizua nga shoqata “Veshalla” që tash e shumë vite vepron në Zvicër dhe në vendlindje.
Si çdo vit, ky manifestim u solli kënaqësi të veçantë dhe emocion veshallasve, pasi paraqet mundësinë e vetme që i bën bashkë aq shumë mërgimtarë nga ky katund, të ndodhur me punë e aktivitete nëpër vende të ndryshme të Europës e botës.
Krahas banorëve të Veshallës dhe atyre me origjinë nga ky katund, këtu marrin pjesë si miq e të ftuar nderi edhe figura e personalitete të shquara nga fusha të ndryshme.
Për pjesëmarrjen e tij në këtë ngjarje, Lazim Destani në Facebook shprehet:
“Votra jonë na bashkon” ishte ngjarja tradicionale e katundit Veshallë ku dje pata nderin të marr pjesë. Është ky një manifestim i përvitshëm që organizohet nga Shoqata “Veshalla”, një organizatë humanitare e kulturore e themeluar nga mërgimtarët veshallas në Zvicër.
Në këtë festë madhështore që solli gëzim e kënaqësi te të gjithë, në mesin e qindra pjesëmarrësve të pranishëm ishin edhe shumë miq e personalitete, përfaqësues institucionesh, diplomatë, apo emra të shquar të artit, kulturës, arsimit e jetës shoqërore.
Pranë shumë miqve të mi nga Veshalla, këtu kaluam çaste të këndshme së bashku edhe me personalitete si, Kryetari i Komunës së Tetovës Bilall Kasami, Ambasadori i Austrisë në Shkup Martin Pammer, Ambasadori i Maqedonisë së Veriut në Zvicër Rexhep Demiri, aktivisti kërçovar Florim Useini, e shumë të tjerë.
Programi artistik me këngë e valle popullore tradicionale i dha bukurinë e veçantë këtij manifestimi ku spikatën vallet me kostume kombëtare si dhe paraqitja e grupit të vajzave të Veshallës. Ndërsa grupi i këngëtarëve të ardhur nga Kosova me interpretimet e tyre e shndërruan festën në një ditë të paharrueshme.
Takimet si ky, krahas dëfrimit që u sjellin pjesëmarrësve, gjithsesi përbëjnë kontribut të paçmueshëm për ruajtjen dhe promovimin e vlerave dhe trashëgimisë sonë popullore që ndër shekuj është bartur brez pas brezi, gjithandej trojeve tona.
Me këtë rast, drejtuesit e Shoqatës “Veshalla” me kryetar Ismail Rushani, duke i falënderuar për ftesën, i përgëzoj për aktivitetet dhe kontributin e tyre shumë të çmueshëm.
